تحذير من زلزال وتسونامي يضرب مصر

 ودي مسألة بتناقش في الأوساط العلمية عادي ودائما كنت بناقشها في مواضيعي من سنين معاكم..

لكن الي مش عادي هو استغلال السيناريوهات دي لطرح معلومات غير دقيقة وتوقعات غير مسؤولة.. لإرضاء رغبات شخصية والله اعلم بالنوايا !

أبرز السيناريوهات دي حاليا هو إنزلاق جزء من بركان إتنا في البحر المتوسط بما ان إتنا بيسجل انفجارات مستمرة الفترة دي ولكن دا لسه محصلش.. ومحدش عارف او قادر يتوقع دا هيحصل امتى 

وواحده من السيناريوهات كمان هو وقوع زلازل مدمره مركزها البحر او سواحل زي ايطاليا واليونان مع هزات ارتدادية قوية.. وده بردو محصلش .. والكثير والكثير من السيناريوهات

والي يقول انه عارف امتى وازاي ممكن يحصل إنزلاق لإتنا في البحر او
حدوث زلزال مدمر فا هو كداب او دجال او جاهل.. قولا واحدا 
خلال السنين الي فاتت حصل زلازل قوية وصلت ل ٦ و٧ رختر وصدر تحذيرات لتسونامي وتم اخطار دول عربية بالتحذيرات فعلا لكن الامور عدت على خير عادي ومحصلش الضجة دي

في البوست السابق لما كنا بنتكلم عن إتنا أثرت نقطة التسونامي دي و اتكلمت في الموضوع لأني كنت متوقعه ان بعض الاشخاص هيستغلوا اضطرابات المتوسط في الترويج للهبدة دي .. قولنا ان احتمالات التسونامي قائمة ومطروحه لكنها مستبعده دلوقت ومفيش ولا جهة او مركز أطلق اي تحذيرات عن تسونامي
ومن باب الأمانة ان اي شخص يتكلم في موضوع التسونامي طالما بيقدم نفسه لجمهوره على انه متخصص يذكر ان البحر المتوسط بيشهد اضطرابات من نهاية السنة الي فاتت لأسباب مناخية بحتة وواحده من الظواهر الملحوظة السنة دي هي ارتفاع الأمواج بطبيعة الحال .. يعني بدون فزلكة اي نشاط زلزالي او اي اضطراب يحدث في البحر المتوسط من الطبيعي انه يسبب المزيد من ارتفاع واضطراب الامواج على سواحلنا لكن مش بالضرورة يتحول الأمر لتسونامي لأن في ظروف استثنائية جدا له

وقبل ما الناس تسلم دماغها لأي معلومة بتنزل بدون مصدر ممكن نحمل تطبيقات زي Disaster alert من ال PDC او NERV disaster وهيوصلكم تحذيرات لأي موجات تسونامي محتمله في البحر المتوسط لو في اي خطړ او تحذير حقيقي صدر من الجهات المختصة المسؤولة عن مراقبة المحيطات والبحار والكوارث الطبيعية الي بيرصدوا التسونامي ويصدروا تحذيرات منه قبل مختصين الفيسبوك

ولكن نرجع ونقول .. هل مستبعد ان يحصل تسونامي مدمر فعلا  

لا لكن لازم تتوفر ظروف معينة

هل اللي بيحصل من انحسار للشاطئ في بعض المدن المصرية وارتفاع الامواج في مناطق أخرى يعني ان في تسونامي مدمر هيحصل خلال الايام الجاية 

بردو الإجابة لا .. والقصة هتنتهي على ارتفاع الامواج وربما خروجها عن حدود الشاطئ نوعا ما وشويه وهترجع الامور لطبيعتها ان شاء الله الا لو جد جديد وقتها ممكن الكلام يختلف

وهرجع أأكد ان ارتفاع الامواج السنة دي مسألة ملحوظة من بداية السنة ولها أسباب مرتبطة بتطرف المناخ وهيتضح لنا دا مع دخول الشتاء وبداية الحالات الجوية وتشكل المنخفضات.. ودا أمر سلطات الدول المطلة على سواحل المتوسط كله على علم بيه.

ودي مش هتكون اول او اخر مره نشوف ارتفاعات لأمواج البحر سواء بسبب زلازل او حالات جوية متطرفة.